不可思議星期日

幾個月前, 我身上發生咗件怪異事件: 嗰日係星期日嚟嘅, 媽咪佢哋一早帶我落街, 又唔係去沖涼喎, 而係去咗隔離一間好大嘅鋪頭度。之後佢哋帶我入咗間房，同一個未見過嘅鬼婆用英文交談 (因為我平時有睇Discovery 青奴所以知係英文), 冇耐媽咪佢哋就閃人, 我就暈低咗唔知發生乜事喇!!

<--- 我覺得下身硬係少咁啲嘢

當我醒返時, 發現自己戴咗喇叭, 個人攰攰哋, 下身仲輕飄飄少咗啲嘢咁，好奇怪呀呵? 後來我發覺自己講嘢, 比以前陰聲細氣, 都唔知搞乜?好邪呀喂!!!

黑獄斷腸歌之狗竇

本來, 我係訓籠嘅, 但媽咪同老豆覺得我困住一整日好陰公, 於是俾我通屋走。但唔知點解, 我一冇人睇住，就鍾意隨地尿尿, 仲踩到成間屋濕晒，結果被迫困返籠。無耐, 佢哋又覺得我慘, 於是買咗個欄, 圍咗個狗竇俾我, 裏面仲擺埋豹紋屋仔同廁所, 查實係一間不少狗仔夢寐以求嘅豪華套房。我開頭都住得好好哋, 點知又抵受唔到周圍尿尿嘅誘惑, 最後又日日搞到個竇污糟晒。後來佢哋搵張膠枱布幫我墊，我又忍唔住咬爛佢。結果，我又困返籠。

你哋通常叫呢啲做抵死定犯賤？

<--你哋都唔望鏡頭嘅!
西貢有乜玩

唔知大家最近去邊度蒲呢? 我就去開西貢喇。都幾山長水遠o架, 要轉幾次車添呀, 媽咪話如果自己搭車的話。我哋就通常坐姨丈架車去, 不過佢個仔我表哥柴仔成日途中暈浪, 好鬼渣。西貢有乜玩好呢? 多到數唔晒啦: 有好多同類可以互相追逐同吠、望吓女仔 (通常呢樣老豆比較熱衷)、有時媽咪會放開條狗帶俾我自己行、有得睇人食海鮮。不過最重要，仲係有大量狗主派發免費零食，由於人人拎嘢食出嚟時我都撲上去, 聽講我依家喺西貢已經出哂名, 好威!!

上鏡

最近有雜誌上嚟影我哋屋企，都唔知有乜好影，可能就係學人哋啲家居書咁講，間屋反映屋主身份，你睇間屋同我都係白雪雪就知襯晒啦!! 我都唔明, 影間屋咪算啦! 硬係要個屋主上鏡, 搞到人鬼咁尷尬, 仲登三張相咁多, 隔離左右師奶見到邊好意思啫!!個攝影哥哥話想間屋有多啲人氣，提議不如影埋老豆個樣, 我好大方唔mind 嘅, 橫掂佢個樣都係出細細張之嘛。 攝影哥哥影到我幾瘦-----︿

好掛住你哋(啲零食) !!

大大話話, 呢個blog都成半年冇update啦, 點解呢, 因為我懶o羅!!大家係咪好掛住我呢?我都好掛住你哋呀!!

<---望街依然係我嘅嗜好

呢半年入面我身邊當然發生好多事啦, 例如我大隻咗又肥咗, 揀飲擇食, 開始冇咁憎狗; 不過屋企好多嘢仍然冇變, 例如老豆同媽咪仍然聽晒我話, o的糧換咗但味道根本一樣, 廁所條抹手毛巾仍然好易臭等等。為咗補償我之前嘅懶, 我會一次過update呢半年嘅事, 記住收睇呀!

高智能廁所

呢塊高智能廁所, 係韓國最新出品, 聲稱狗仔尿尿完之後唔會印到周地濕晒 ( 其實只不過漏左落底, 有幾高智能？), 而且唔使經常換片，一次過解決晒平日老豆最頭痛既煩惱，結果佢耗資178蚊買返黎，點知: 1. 原來依然係會踩濕o既 ; 2.因為o的尿尿會黐住塊網底，反而會有味; 3. 有味的話, 我拒絕循環再用, 因此仍然要經常換片; 4.由於我唔係太習慣呢個新廁所, 最近經常在客廳開大。其實我好掛住個舊廁所, 亦要求用返, 但聽講已經放左上ebay賣。

青山散步

我隻甩毛腳終於好返, 可以出街玩, 早排去過大尾篤, 亦去過爺爺筲箕灣屋企附近, 仲有......我已經唔記得左啦! 不過最鍾意, 都係屋企樓下散步, 一來方便+空氣好+公園大, 二來附近好多人養狗, 可以social下, 不過佢地通常都唔係由屋企人帶, 而係由一種叫菲傭o既女仔帶o既, 佢地帶得好pro架, 放狗之餘同時間仲可以一邊傾手提電話, 一邊打牙骹, 唔似得媽咪同老豆咁雞手鴨腳, 例如︰唔記得帶報紙, 求其響地下執塊樹葉同我執屎, 然後偷偷摸摸掉埋一邊。不過我梗係鍾意媽咪帶多o的啦 !因為我成日拖住佢地跑, 走到佢地氣咳, 好鬼好玩架!

蘋果君

好耐冇見! 新年之後我好鬼懶, 掛住睇<神鵰俠侶>DVD, 前排下午又追<九五至尊>, 冇心機update, 真係sorry。 最近我多左一個新玩件伴, 佢就係蘋果君啦! 你知我媽咪出晒名孤寒, 從來冇買過玩具俾我, 由細到大我o的玩具都係佢公司D辨。老豆見我咁陰公, 玩來玩去都係得果幾樣, 於是有日行開街就幫我買玩具, 但你知佢份人幾騎呢啦, 唔怪雞都唔鍾意, 竟然好揀唔揀就買左呢個公仔----一個扮蘋果o既人(其實似忍者多D), 我都未見過狗玩具咁樣衰。不過玩落蘋果君原來好好玩, 發出必必聲之餘, 掉出去時仲會無定向反彈，而且睇落佢都幾cute, 有幾分似媽咪架, 怪唔得老豆咁鍾意啦!!

恭喜發財!!!
Hi 大家好!! 我係肥肥!! 雖然係遲咗o的, 但都要同大家拜個年, 恭祝大家新年快樂, 萬事勝意!!! 今年係我第一次過新年, 可以出去玩, 又有利是逗, 真係好happy!!!! 係到要多謝大家o的利是, 我會儲埋留返讀大學, 唔會亂咁用。我o既新年願望係下年逗多o的利是, 多謝支持!! 肥肥上

TO拖肥

你男人老狗咪鬼喊啦! 我唔係唔想睬你, 但我真係好憎俾狗追住聞, 搞到人成身口水。下次一齊玩下飛行棋、睇下dvd、食下茶點咪好o羅, 再唔係, 落勝利道shopping洗頭都OK呀, 果度好多狗女架! 總之唔好再聞我啦, 依家唔興架啦! "貓犬通訊"上期都係咁講架。話時話, 好彩果日你冇跟車入流浮山食燒蠔咋, 果度又凍又黑, 而且我地根本冇份食o既。更大鑊,係回程時我老豆架車又有事, 第三次出動拖車, 搞到半夜至返到屋企。計我話, 屋企不如換架拖車, 咁就唔使下下call拖車啦。FROM 肥肥

P.S. 欲知事情的另一版本, 請到拖肥BLOG 。

新年別注!! 肥肥寫真展開催

為慶祝新年, 我特別舉辦左一個寫真展, 大家可以o係入面睇到我出道以來o既珍貴玉照，但由於Blogger好鬼蠢冇gallery功能，大家請click入去-->Y!BLOG睇啦!! 入場費全免, 但記住要俾利是我噃! 交俾我老豆同媽咪就OK架啦!!

假狗

由於平日見人多過見狗，老豆同媽咪最近發現我唔鍾意同狗玩 (發現因由留返下次先講), 於是前兩日佢地行花市時, 買左一隻同我差唔多樣o既公仔陪我, 等我學習同狗相處之道。呢隻名為"瘦瘦"o既假狗（查實佢仲肥過我）, 每日在佢地控制下, 模擬同我爭食狗糧、聞我屁股、一齊玩波等等，尋晚我仲發現佢霸埋我間新屋添。不過我一o的都冇介意，因為呢隻野個樣實在太假，我根本投入唔到，只當佢係攬枕。
<<你話佢係咪假到爆?

機洗

上個weekend我終於去沖涼, 先知原來狗仔洗白白都有分機洗同手洗, 我咁潮, 梗係揀機洗啦（主人按:其實該店只有機洗）。過程係咁o既: 肥婆店主幫我登記個人資料，然後就將我放入一個自動浴缸中, 缸上o既噴嘴就會自動噴出水同shampoo, 幫我洗白白。

我淨係識擺呢個甫士>>

洗乾淨掠乾水, 阿肥婆就將我放入另一架自動風機度吹乾（如果你有睇過"Austin Powers", 就會知道大概係點）。阿肥婆同我講, 話有好多狗仔因為唔習慣機洗, 嚇到失禁, 要重頭洗多次, 咁容乜易沖到天黑！

之後阿肥婆幫我剪髮，仲想幫我紮辮添, 我當然即刻大聲嗌唔好, 我一早表明性別係M架, 你唔係咁失憶下話? 沖完涼o的毛真係又鬆又香喎, 睇落肥仲左一倍。洗剪吹夾埋盛惠$100, 新年都冇雙計, 間野幾勻真, 所以下次我想電埋。

<<我寫blog時好認真!!! 唔好嘈我!!

Daddy, Happy Birthday!!

1月16日喺我爹地生日, 所以星期日晚有好多人嚟我屋企玩. 但喺我就有o的唔開心, 因為個日下午去咗睇醫生, 間診所又好鬼多人, 等咗好耐先輪到我. 無無聊聊梗喺同周圍o的病友交流吓啦! 點知咁啱隔離位朋友又喺有毛囊虫, 仲喺返发!!! 但佢已經六歲, 真陰功!!

最唔開心都喺見唔到徐醫生, 剩返個驚青女醫生, 慌死我咬親佢咁!! 仲話要我嚟多次,啋佢都傻!!!

返到屋企後, 媽咪即刻幫我扮靚, 話唔好失禮人喎!! 大哥哥姐姐一嚟到, 都話我大隻咗好多!! 唔知呢啲算唔算讚美嘅說話呢?? 最開心就o係見到謝琳姐姐做的生日蛋糕, 仲好好食…我估…..因為又冇我份….!!

打齊針, 好性感

聽聞漁獲處逢星期二都有流動車落大埔，為狗仔打瘋狗同晶片針, 所以今日老豆帶我落去打。落到去, 我地搵極都搵唔到架車, 經一名收買佬指點下, 我地終於發現— 竟然係一架綿羊仔電單車!! 於是老豆問果位企響度、完全唔似獸醫o既光頭佬:「響邊度打?」佢話:「地下o羅!」之後光頭佬就響綿羊仔後面個箱, 從一個街市膠袋入面拎D針出黎，再攤開一張上下對摺, 用左唔知幾多次o既舊報紙，叫我企上去打針。光頭佬真係熟手，5秒唔夠就打晒兩支針, 我只係感覺到俾人響背脊拮左兩下。最後我地就得到政府狗牌:一張A4影印紙。原來狗仔攞身分證咁鬼兒戲同污糟, 怪唔得冇方力申賣廣告。

我老表

前兩日, 我去探我姨媽, 見下我表哥柴仔。咪睇柴仔個樣普普通通, 其實佢係柴犬黎o既 (佢個名都改得好行啊呵?) , 係日本國寶級名犬, 所以姨媽餐餐餵雞脾佢食, 離譜 !! 雖然柴仔身嬌肉貴, 但卻有一個不良嗜好, 就係鍾意聞我屁股, 不過大家唔好誤會, 佢唔係基o既, 狗仔聞同類屁股, 係為左知道對方年齡同性別, 但我唔明點解佢要聞足成晚, 似乎係我屁股有雞脾味。

<< 罪證如山

另外姨媽屋企仲養左一對貓, 我趁佢地唔覺, 偷食佢地D糧, 原來係好味過狗糧好多o既。

沉迷

最近呢，媽咪好沉迷一種玩意，就係迷你食品玩具。事緣某日媽咪同老豆行超市，見到呢種玩具做promo，睇到唔捨得走，於是就買左個玩具廚櫃返去，其實屋企廚房已經有個大廚櫃啦，為乜仲要買多個呢？雖然我係狗，但都明白玩物喪志呢個道理（正如我玩波時都會喪晒），前幾日媽咪又買左成個蛋糕櫃返黎，仲買晒一套蛋糕呀，你估成set野幾錢？夠我買3包糧食半年啦!!真係吖。過兩日等我冇咁忙，會同佢講勸佢慳家D。

多謝Paco

肥肥blog推出以來，深受各界歡迎（仲引來同類抄襲!!）, 趁呢個機會我要多謝我o既fans，多謝我o既經理人公司! 多謝Paco! 多謝媽咪幫我梳毛! 我會繼續努力唱多D好歌比大家聽!（我近排睇電視人地都係講呢幾句）現送上BB時玉照一張答謝大家。其實媽咪都有新news報俾大家，但佢唔係太識打中文(但唔知點解打PSP佢又好快上手) ， 大家耐心D等下佢篇大作啦。

口咬咬

今日我因為繼續口咬咬，又俾媽咪用籐條招呼，為左改善我呢個壞習慣，佢今晚同我進行一個好偉大o既特殊訓練----俾隻手我咬。咬得太犀利個陣，媽咪就會大聲叫no同濕我一下，最後情況真係好似有D改善，而媽咪心情亦好左好多，猛攬住同我影相，其實主要因為佢自己剛剛剪左頭髮啫。

媽咪絕密四眼雞丁look >>>

另外，我俾佢地改左個花名叫「廁所實Q」，因為佢地去親廁所我都跟出跟入睇實，但我去廁所佢地夠睇住我咯，又唔見我改佢地花名，衰到死!!!

臨訓前聽到老豆同媽咪討論我第一次沖涼，應該在屋企沖，定係去美容院沖，最後定案好似係出去沖，因為驚搞我唔掂，但日期將會延遲，因為本周末開始轉凍，驚冷親我。天氣咁凍，睇黎我o個件"小蜜蜂cosplay衫"又要出動，咁各位都著多件衫啦。

關於喇叭

有讀者問我乜野係"喇叭"，就係圖中呢種狗頭笠。戴住好痕，視野又唔清楚，食野都慢過人， 我前前後後戴左成兩個月，你話幾慘情。

新年假

呢個新年假有好多事發生:

1. 我已經6個月，但係依然未打齊針，事關我隻手生癬，呢類病本來好小事，但唔知點解我醫極都唔好，今次去覆診，醫生竟然話我唔係生廯咁簡單，而係有毛囊蟲，要食一隻好貴又好難食o既藥，仲要食成100日!! 不過醫生話我可以除低個 "喇叭"，亦再唔駛用紗布包手，free晒。

2. 隻藥真係好難食，媽咪同老豆用針筒餵我，我即時發惡，搞到成地都係，俾老豆用藤條fit到飛起，我入黎住咁耐都冇見過佢地咁嬲!!!咁真係好難食嘛!!!! 聽講我搞到媽咪同老豆個周年紀念冇晒mood，sorry o羅。

3. 第二日佢地將隻藥混和在"狗狗益力多"入面俾我飲，唉，其實我都知D益力多加左料，但由於佢地拎走支水，好口渴，都要照舔晒佢。

<<< 嫲嫲

4. 我第一日出街喇!!!!1月1日嫲嫲同Sherry姨來探我，帶我去汀角路玩，仲去食泰國菜，不過我唔落得地，又冇份食，都幾悶。話時話，Sherry架寶馬真係好坐過老豆架MOVE好多，呢o的先係車嘛。唔知屋企幾時換車呢?

5. 因為太free，我呢幾日好曳，尤其鍾意咬人。今日佢地強迫幫我剪趾甲，我發惡咬到老豆手指有兩個窿，仲流血，今次冇俾人打，但聽講一個星期冇零食。

<<< 我就係肥肥 (兩個月大)